教餅, 需要準備一d蛋糕盒俾人用, 澳門又冇蛋糕材料用品專門店, 超巿更加冇d咁既野, 最近每次過香港都係來去怱怱, 冇機會去買空既蛋糕盒…唯有去d餅店買少量西餅, 以得到那些盛載西餅的餅盒.

話說昨晚去某餅店買西餅, 想搵兩個餅盒, 入門口就問佢有咩餅盒, 佢拎出個細長既盒, 以及一磅蛋糕盒俾我睇. 然後我選了幾件份量不能放入細長盒的餅, 想她會給我一磅蛋糕的餅盒吧.

那知她居然說, 只可以給我兩個細長盒, 不可以用一磅蛋糕的盒, 因為一磅蛋糕盒是用來放一磅蛋糕的.

因為時間不早, 我住離島, 夜晚四周冇乜餅舖. 於是我就唯有死ler…我話我已經買相當份量的西餅喎, 然後我擺明車馬, 我話我其實只係想要個盒, 都知佢生意難做, 就買d餅, 低聲下氣咁求下佢, 問佢可否幫幫忙呢…?

佢話d蛋糕盒好貴, 因為款式好靚, 好少貨, 真係唔捨得俾我, 除非係買一磅蛋糕啦…

我繼續ler佢….(師奶講數情節大同小異, 怕悶親大家, 唔重覆.)

最後ler到我眼都紅埋, 佢終於肯俾個一磅盒俾我, 仲要一路包一繼續講: “d盒真係好貴嫁…不如你就考慮下買個一磅蛋糕啦…"

估唔到為左個餅盒, 連尊嚴都要丟棄埋. 早知如此, 去之前塗定d厚顏先啦.