尋晚去左幫手做教會個聚餐, 負責幫d來聚餐既家庭影全家幅. 係影阿鐘哥果下搞笑囉, 佢地成晚都有表演, 完左表演又要周圍去執返d細路埋位, 埋得位來又有其他節目進行影唔到相, 有時間影相果陣佢地又出左去攞獎, 攞完獎就更加俾人大包圍同佢地影相, 於是來來去去都等唔齊人, 直到差唔多散席先至搞掂. 不過佢地行catwalk真係好掂, 好鬼型, 真係抵佢地攞冠軍 ^o^

今朝一早八點幾去三盞燈出血買花, 買左八十蚊花, 返到教會紮好左, 九點幾諗住去佳力碰下運氣睇下佢有冇咁早開工, 又真係岩岩開門喎, 於是買左廿蚊花紙+紗+蝴蝶帶, 同淑芬一齊包左兩束花, 果然係兩個人包兩束花抵好多, 每束成本都係得五十蚊, 好抵呀 ^o^ 若然去花店買, 每束就要五百蚊喇. 包好左, 送俾媽咪, 佢笑得好甜呀 @_@

後記: 媽咪鍾意束花鍾意到唔捨得拆, 只係成束原封不動放響瓶上, 偶爾響花朵枝條間既空隙加水.